Simmukon ti lalaki a nangpaltog iti inana iti Barangay Capangdanan, Bantay, Ilocos Sur.
Ti biktima ket agtawen iti uppat a pulo ket uppat, mangisursuro, agnaed iti nasao a lugar idinto a ti suspek ket ti anakna nga agtawen iti sangapulo ket walo.
Iti pannaki-uman ti Bombo Radyo Vigan ken ni Police Captain Donaldson Pagalanan, nadakamat kadakuada ti suspek nga adda nadagsen a parikutna isu a naaramidna ti krimen.
Ti paltog nga inaramat ti suspek ket naggapu iti pimmusay nga amana ngem saan nga ammo daytoy ti inana.
Maibasar iti imbestigasion, matmaturog ti biktima iti kuartona kadua ti anakna a lalaki nga agtawen iti sangapulo ket dua idi nakangngeg iti putok ti paltog.
Idi maamiris ti biktima a natamaan, nagpaarayat a dagus iti anakna nga agtawen iti sangapulo ket walo nga isu ti nangitaray kenkuana iti ospital agingga nga inaklunna met laeng nga isuna ti nangpaltog iti inana.
