Love triangle ti rumrummuar a motibo ti napasamak a pammaltog idiay Barangay Gusing, Sta. Maria, Ilocos Sur maibasar iti agtultuloy nga imbestigasion dagiti pannakabagi ti linteg.
Ti biktima ket lalaki nga agtawen iti limapulo ket tallo, dati a barangay tanod idinto a ti suspek a maysa met laeng a lalaki nga agtawen iti tallopulo ket lima, agpada nga agnaed iti nasao a lugar.
Iti pannaki-uman ti Bombo Radyo Vigan ken ni PLT. Jenson Refuerzo, naurnos idin dagitoy a saan a pagkikinnaawatan dagiti karaman babaen iti panagpapatangda iti barangay ngem nadamag latta ti suspek ti relasion ti asawana iti biktima.
Aminado met ti babai nga asawa ti suspek nga adda relasionda iti biktima ken masansan ti pannakakita ti anak ti suspek a mapmapan ti biktima iti pagtaenganda.
Agam-ammo dagiti suspek ken biktima ta no adda kasapulan ti tunggal maysa ket isuda pay ti agpinpinnabulod ngem pasaray ti pananginsulto ti biktima iti suspek isu a mapapati a napunwan isu a napatayna.
Adda iti talon ti suspek ken biktima idin ta pinaltuganna daytoy iti namitlo a daras a puon ti nakatayanna.
Boluntaryo met laeng a simmuko ti suspek kadagiti pannakabagi ti linteg.
