Naammoan a naka-inom iti arak ti lalaki a nagmotorsiklo a natay gapu iti pannaka-aksidentena iti national highway idiay Barangay Poblacion Sur, Santiago.
Ti driver ti Mio I 125 motorcycle ket ni John Loyd Ayson Quines, agtawen iti duapulo ket maysa, baro, construction worker nga agnaed idiay Barangay Mambug, Santiago.
Iti pannaki-uman ti Bombo Radyo Vigan ken ni Police Captain Pete Oliver Soriano a Chief of Police iti Santiago Municipal Police Station, addan ti impluwensya iti arak ken ni Quines idi nagmaneho iti motorsiklo ta napan gimmatang ti nayon nga arak nga inomenda iti sentro ti ili idin naawanan ti kontrol ti manibelana idi nagsikko a gappuanan ti pannakaidungparna ket naibansag pay ti driver iti kayo isu a naitama iti ulona ta saan a nagaramat iti helmet.
Maysa agingga tallo a metro iti kaadayo ti motorsiklo manipod ken ni Quines a mangipasimudaag iti napigsa nga impact a gappuanan ti pannakadunor iti ulo ken nadumaduma a paset ti bagina.
Immunan a pinaritan ti inana a pumanaw iti pagtaenganda gapu ta naka-inom iti arak isu nga indulinna ti tulbek ti motorsiklo ngem impilit iti nagmaneho ni Quines a gappuanan iti pannaka-aksidentena.
VIDEO – POLICE CAPTAIN PETE OLIVER SORIANO
