Arigna makatawen a namonitor ti garaw iti lalaki a nakemmeg iti buy-bust operation idiay Sinait, Ilocos Sur.
Ti suspek ket agtawen iti tallopulo ket lima, naasawaan, tubo idiay Badoc, Ilocos Norte ken caretaker iti maysa a pagtaengan idiay Barangay Ballaigui, Sinait.
Iti pannaki-uman ti Bombo Radyo Vigan ken ni PMaj. Bryan Romeo Lopez a Chief of Police iti Sinait Municipal Police Station, naipakaammo kadakuada iti mapapati nga illegal nga aramid ti suspek idiay Ilocos Norte isu nga iti panagtaltalinaedna iti probinsia ket minonitorda agingga natiempoanda ken nakemmeg.
Segun ken ni Lopez, nabayag sakbayda a nakemmeg ti suspek ta pasaray aglemlemmeng ngem saan a nagsardeng dagiti pannakabagi ti linteg ta saanda a kayat a maapektaran iti ilida gapu ta drug-cleared amin a barangay idiay Sinait.
Apaman a nakemmeg ti suspek ket inaminna pay a kalkalpasna laeng a nagusar iti illegal a droga a nakumpirmaran babaen iti naisayangkat a drug test kenkuana.
Kabayatanna, awan met ti nagbalin a parikot iti suspek ta kinuna ni Lopez a “very cooperative” gapu ta naibagana dagiti tattao a kakaduana nga adda met laeng illegal nga aramidna.
