VIGAN CITY – Agtalinaed paylaeng idiay custodial facility ti Cabugao Municipal Police Station ti suspek a ni Melchor Tatson a nakapakatay ken ni Reynaldo Tatson nga uliteg na ta napagbiddutan na nga alingo idi napan da naganup idiay kabanbantayan a paset ti Sitio Caset, Maradodon, Cabugao.
Segun ken ni Police Captain Ramil Learenas, hepe ti Cabugao PNP, ti panagipila ti kaso itan a panawen gapu ti enhanced community quarantine ket babaen ti E-Inquest wennu babaen ti online agsipud ta awan met iti opisina ti piskalya wennu korte.
Uray nu naipilan ti kaso a Reckless Imprudence resulting to Homicide kontra ti suspek ket saan pay laeng a nakapagdesisyon ti pamilya ti biktima nu agipila da ti Affidavit of Disistance ta awan met iti sabsabali kadakuada agsipud ta agkakabagyan da met ken saan nga ingagara ti suspek iti napasamak.
Agsipud iti dayta, posible nga inton malpas iti krisis to pay laeng a makaruwar ti suspek ket kas iti pannakaipila iti kaso na, mabalin a babaen ti online to met laeng iti panagpiyansa na.
