Natalgeden ti kasasaad ti maysa a dayber ti motorsiklo a karaman iti aksidente iti provincial road idiay Barangay Baballasioan, Sta. Maria, Ilocos Sur.
Nabigbig ti drayber ti Honda Wave 110 motorcycle a ni Romeo Agustin Macasiray, agtawen iti pitopulo, naasawaan, mannalon nga agnaed iti nasao a lugar.
Ti met drayber ti Motorstar 125 ket ni Venson Manglimot Casabar, agtawen iti tallopulo ket uppat, taga-Barangay Gusing, Sta. Maria.
Iti pannaki-uman ti Bombo Radyo Vigan ken ni PLT. Jenson Refuerzo, agpapadaya a direksyon ti Honda wave ket idi nadanonna iti kurbada a paset ti kalsada, inovertake-anna dagiti dua a motorsiklo a sarsarunwenna ngem nag-overshoot ket naidungpar iti sumungad a Mototstar 125 a naggapu iti bangir a direksyon.
Gapu dayta, nadugolan ti ulo ti drayber ti Honda wave a naipaagas iti ospital para iti pannakatamingna.
Adda metten ti nagpatangan dagiti dua a drayber mainaig iti napasamak.
