Imbabawin ni Barangay Captain Paul Cabasal iti kaso nga ipilana koma kontra iti maysa a lalaki a nanggandat a mangtagbat kenkuana idiay Barangay Sulvec, Narvacan.
Ti suspek ket agtawen iti uppat a pulo ket dua, maysa a mannalon, agnaed iti nasao a lugar.
Iti pannaki-uman ti Bombo Radyo Vigan ken ni Cabasal, insanudna ti kaso gapu ta nadlawda a mapapati nga adda parikut iti panagpampanunot ti suspek isu a kinapatangna laengen ti pamiliana tapno maidalan iti rehabilitation.
Nagtaud ti pasamak iti panangilako ti suspek iti baka a saanna a kukua ta agserbi laeng koma nga ahente iti agserbi a buyer ngem nagbabawi ti gimmatang.
Binagaan ti akinkukua iti baka nga isunan ti bumiruk ti sabali a gumatang ngem napan latta innala ti suspek ti dingwen a saan a nagpakpakada ken inlakona.
Nagreklamo ti akinkukua isu nga impasubli ti kapitan ti kuarta manipud iti suspek.
Ngem imbes a sumurot, ginandat ti suspek a tagbaten ti kapitan babaen iti wasay sa pinagsawsaw-anna sakbay a naglibas ngem nakemmeg babaen kadagiti nagresponde a kapulisan.
