Napilaanen ti kaso a theft ti lalaki a nagtakaw iti maysa a paglakoan idiay Barangay Bagani Campo, Candon City.
Ti biktima ket agtawen ti uppat a pulo ket maysa, negosiante, residente ti nadakamat a barangay idinto a ti suspek ket agtawen ti tallopulo ket dua, karpintero residente met laeng iti nasao a siudad.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, agtaltalinaed pay laeng iti agdama iti kustodiada ti suspek ket mayur-uray ti commitment order-na tapno mayakar iti Bureau of Jail Management and Penology (BJMP).
Segun ken ni Antalan, pinaglibakan pay laeng idi umun-una ti suspek ti inaramidna a panagtakaw ngem idi naipakita kenkuana ti CCTV footage ket saanen a nakapagkedked ta nalawag nga isuna iti adda iti footage.
Maipalagip nga idi kalman iti alas nuebe iti bigat ket naduktalan ti biktima a nakalukat ti aluminum cabinet iti uneg ti pagtagilakoanna ken napukaw iti naka-bundle a P150,000 ket iti panang-review-na iti CCTV footage naduktalanna a ti suspek iti nangala iti nasao a gatad a gappuanan met iti panagreport-na kadagiti otoridad.
