VIGAN CITY – Im-imbestigaran dagiti kameng ti Magsingal Police Station ti pammaltog idiay Brgy. Barbarit a nakatayan ti biktima a ni Peter Paul Ramirez, agtawen ti innem a pulo ket tallo, driver ken agnaed idiay Brgy. San Ramon, Magsingal.
Nakalugan ti tricycle ti biktima ta agawid kuman idi pinaltugan dagiti saan pay nabigbig a suspek a nakalugan iti motorsiklo iti mamin-adu a daras a nakatamaan iti naduma-duma a paset iti bagi na.
Ti pannaki-uman ti Bombo Radyo Vigan ken ni PMaj. Rodel del Castillo, mangidaulo ti Magsingal PNP, kapatang danto dagiti kameng ti pamilia ti biktima no adda iti pangta iti biyag a naaw-awat na sakbay iti pasamak.
Maysa kadagiti kitkitaen nga anggulo da del Castillo ti kaso a frustrated murder a nakairamanan idi ti biktima agsipud ta tawen 2010 a naiparuwar ti warrant of arrest kontra kenkuana ngem idi laeng February 2019 a naibanag dagiti otoridad.
Kidkiddawen ti hepe kadagiti maka-ammo ken nakakita iti pasamak a makikinnammayet da kadakuada tapnu maikkan iti hustisya iti pannakatay ti biktima.
