VIGAN CITY – Agtultuloy ti imbestigasyon ti Magsingal Police Station no adda pay naun-uneg a rason iti panagbekkel ti maysa a menor de edad idiay Brgy. Patong.
Segun ken ni P/Maj. Joel Castillo, inungtan ti inana ti biktima gapu ti nakaro a panagusarna iti cellphone a puon metten ti ipapanawna iti pagteanganda.
Awan pay laeng ti makitada a sabali a motibo iti panagpakamatay ti biktima ta daytoy ket adda laeng met iti uneg ti balayda nga agmod-module ken awan met ti nadakdakamat nga adda nobyona a posible koma nga isu ti maysa pay a pakarikrikutanna.
Maipalagip a ti biktima ket nasarakan ti adingna a nakabitin iti kalapawda babaen ti tali isu a nagpaarayat iti ikit ken kasinsinna a mangibaba kenkuana.
Naipan pay ti biktima iti Magsingal District Hospital ngem naideklarar a dead on arrival.
