VIGAN CITY – Kaso a reckless imprudence resulting to double homicide and damage to property iti maipila kontra ken ni Geronimo Valdez Jr., nga agtawen ti lima pulo ket maysa a taga- Banagoilan West, Bangar, La Union a nagmaneho ti Isuzu dump truck a mapapati a dinungpar ti Nissan Van a minaneho ni James Oliver Marzan, maysa nga Overseas Filipino Worker nga agtawen ti tallo pulo ket uppat nga agnaed idiay Poblacion West, Pidigan, Abra a nakatayan na ken ti asawa na a ni Rho Anne Marzan nga agtawen ti tallo pulo ket uppat, maysa a nurse idiay Ilocos Sur Cooperative Medical Mission Group and Hospital idiay national highway ti Barangay San Juan, Sta. Lucia.
Segun ken ni Police Captain Leonilo Ancheta, hepe ti Sta. Lucia municipal police station, agpapa-amyanan a direksyon ni Valdez ta ideliver na kuma dagiti karga na a batbato idiay Sta. Catalina idi mapapati nga inagaw ti Nissan Van nga agpa-abagatan a minaneho ni James iti linya na isu a napasamak iti aksidente.
Gapu ta napigsa iti impact iti panagdinnungpar dagiti dua a lugan, napitpit iti sangwanan ti van ket naipit dagiti agassawa a nakalugan ti driver’s seat ken passenger’s seat a nagsagabaan da iti dunor iti naduma-duma a paset iti bagi da a poon iti nakatayan da ken nakadunuran met ti anak da a ni Michael Alfred nga agtawen ti walo.
Kabayatanna, ti driver ti truck ket saan a naan-ano ngem ti minaneho na a truck ket napittak ti windshield na ken adda iti nadadael iti sangwanan a paset ti lugan.
Inpatangken ni Valdez nga awan iti basol na agsipud ta nabuntog laeng iti panagpataray na iti minaneho na a truck ken dua pulo a metro pay laeng iti kaadayo na manipud iti kinasinnabet na a van a nagluganan dagiti biktima ket nakapagprenon ket nalawag nga isu iti dinungpar ti Nissan Van.
Dagiti biktima nga agassawa ket kakaskasar da laeng idi February 15 ken kapabpabunyag da ti makabulan a babai a maladaga nga anak da.
