Nakasaritan ti driver iti SUV dagiti uppat nga akin-kukua kadagiti nadungparna a lugan a nakaparking iti national highway idiay Barangay Calao-an, Candon City idi July 19, 2026.
Ti nagmaneho iti Toyota Fortuner a color avant garde bronze metallic ket lalaki nga agtawen iti innem a pulo ket walo, agnaed idiay Barangay Las-ud, Tagudin.
Dagiti nakaparking a lugan ket pakairamanan iti Black TMX 125 with sidecar, Gray Yamaha NMAX, Gray Honda City ken Mitsubishi Montero.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, iti inisyal a patangan ket pinasingkedan ti driver ti SUV a bayadanna amin a damage dagiti lugan a nadugparna.
Segun ken ni Antalan, iti agdama ket saan nga agipila iti reklamo dagiti akin-kukua dagiti lugan a nadungpar ta pinawaywayanda ti driver ti SUV a mangtungpal iti karina, ket no kas bilang saan a sumurot iti nagtutulagan ket posible a maituloy iti kaso.
Maipalagip a bayat iti panagawid nga agturong ti bagatan a direksyon ti driver ti SUV ket kellaat a naawanan ti kontrol ket idi impadasna a nagpreno ket saan a kimmagat a gappuanan ti pannakadungparna kadagiti uppat a nakaparking a lugan iti western portion iti kalsada.
Iti baet ti pasamak ket awan ti nadangran iti nasao nga aksidente ken naamoan a naggapu a nag-fishing ti driver ti SUV idi napasamak iti aksidente.
