Nasayaaten ti kasasaad ti lalaki a nagmaneho iti motorsiklo kalpasan a nakadinnungparna ti maysa nga ambulansya iti provincial road idiay Barangay Poblacion Norte, Sta. Maria a napasamak idi rabii iti May 13.
Ti nagmaneho iti Yamaha Mio motorcycle ket ni Mark Roland Hufana Tuscano, agtawen iti duapulo ket maysa, baro, station porter, awanan ti driver’s license ken agnaed idiay Barangay Poblacion Sur, Sta. Maria idinto a ti nagmaneho iti ambulansya ket ni Jhay Francis Dela Cruz Escobar, agtawen iti duapulo ket siam, naasawaan, addaan ti driver’s license nga agnaed idiay Barangay Laslasong Norte, Sta. Maria.
Iti pannaki-uman ti Bombo Radyo Vigan ken ni PMaj. Macario Dulawan Jr. iti Sta. Maria Municipal Police Station, napaspas nga agpaamianan ti nakamotorsiklo a naggapu iti national highway ken simrek iti Col. Reyes Street a gappuanan ti panagdinnungparda ti ambulansya nga eksakto a nagsikko iti laud a direksyon.
Gapu dayta ket nadunor iti nadumaduma a paset ti bagi ti driver ti nakamotor isu a naipan iti Ilocos Sur District Hospital – Narvacan babaen kadagiti kameng ti Municipal Disaster Risk Reduction and Management Council – Sta. Maria para iti pannakatamingna ket iti agdama addan ti puotna.
Saan pay laeng a nakapagsarita ti pamilia ti driver ti nakamotorsiklo ken ti driver ti ambulansya para iti pannakasimpa dagiti a kasapulan kalpasan iti aksidente.
VIDEO – PMAJ. MACARIO DULAWAN JR.
