Daan a susik ti rumrummuar a rason iti panangbagkong ti tricycle driver iti padana a tricycle driver iti V. Delos Reyes Street, Vigan City.
Ti biktima ket lalaki nga agtawen iti uppat a pulo ket siam, taga-Barangay IV.
Ti met suspek ket agtawen iti limapulo ket tallo, taga-Barangay Manueva, Santa.
Iti pannaki-uman ti Bombo Radyo Vigan ken ni P/Capt. Emmanuel Abille manipud iti Vigan City Police Station, rimmuar iti imbestigasionda a sakbay ti pammagkong ket adda nagsinnungbatan ti suspek ken biktima nga agpada a nakatambay iti Calle Crisologo nga isu ti lugar a pagpaspasadaanda.
Iti dayta a gundaway, nangasot ti suspek iti kutsilyo nga induyokna iti namin-adu a daras iti biktima a puon ti nakatayanna.
Naglibas ti suspek kalpasan ti pasamak ngem nakemmeg met laeng babaen ti panangtunton dagiti pannakabagi ti linteg iti pagtaenganda.
Kabayatanna, segun met iti suspek, kanayon ti panang-bully kenkuana ti biktima isu a napunwanen.
Kunana nga uray umad-adayo ket ti latta biktima ti kanayon nga umasideg kenkuana a pasaray agkatkatawa ken kumarkarit.
Innayon pay ti suspek a nalaing ti padakes ti biktima ta kanayonna nga ibaga a nakainom no adda iti Calle Crisologo ket iti kaaddada idi kalman iti nasao a lugar, kasla kayat manen ti biktima nga ibansag iti rupana ti pagin-inumanna.
Nupay kasta ket pagbabawyan latta ti suspek ti naaramidna ngem ammonan a naudin ti amin.
Maisagsaganan ti kaso a murder a maipila kontra iti suspek idinto nga agtultuloy latta ti panagimbestigar dagiti pannakabagi ti linteg no ania ti pudno a motibo ti pammagkong.
