Desidido nga agipila iti reklamo ti biktima kalpasan a binagkong isuna ti kabsat na idiay Barangay Salvador 1st, Candon City, Ilocos Sur.
Dagiti agkabsat a karaman iti insidente ket agpada a construction worker, agnaed iti nasao a barangay.
Iti pannakiuman ti Bombo Radyo Vigan ken ni PLT. Jovelyn Antalan iti Candon City Police Station, nagriri dagiti agkabsat kalpasan nga impatang ti biktima iti kabsat na nga isardeng na ti panag-videoke.
Rimsua ti nabara a patangan dagiti dua agingga a naaddanda iti komosyon.
Kabayatan ti pasamak, binagkong ti suspek ti biktima iti nadumaduma a paset ti bagina babaen iti inaramatna a tadi ti manok.
Nagsagaba ti biktima iti dunor iti paset ti pingping ken takiag-na a dagus a naitaray iti ospital para iti pannakatamingna ken addan iti natalged a kasasaad.
Segun ken ni Antalan, saan nga aklonen ti suspek iti inaramid na nga pammagkong iti kabsat-na isu a desidido nga agipila ti darum ti suspek.
Naammuan pay nga adda susik dagiti agkabsat iti napalpalabas maipanggep ti daga.
Mannarimaanen ti pannakasimpa ken pannaka-isagana dagiti dokumento para iti inquest proceeding ti suspek ita nga aldaw.
