Im-imbestigaran dagiti pannakabagi ti linteg ti Magsingal Police Station no adda pakainaigan iti pannakapaltog ti maysa a lalaki idiay Barangay Panay Sur, Magsingal, Ilocos Sur ti panagbalinna a drug surrenderee ken kuridor.
Nabigbig ti biktima a ni Alfredo Tacazon Ugale, agtawen iti uppat a pulo ket lima, taga-Panay Norte.
Ti met suspek ket ni Corting Cortez, taga-Barangay Pangpangdan, Sto. Domingo a nakemmeg babaen iti hot pursuit operation.
Iti pannaki-uman ti Bombo Radyo Vigan ken ni Police Captain Melvin Trinidad, adu dagiti baka a saan a nabaybayadan ti biktima pakairamanan ti kukua ti suspek.
Ngem innayon ni Trinidad nga iti agdama ket nabayadan metten daytoy ti biktima.
Maipalagip a magmagna ti biktima nga agawid idin ta pinaltugan ti suspek nga adda iti likudanna ti namin-ano a daras a nagsagabaanna iti dua a tama iti paltog iti bukot ken tallo iti sango a puon ti nakatayanna.
Hustisya met ti kiddaw ti pamilia ti biktima iti napasamak ta patienda nga awan met nakaririna agsipud ta kunada a nalaing a tao.
Segun ken ni Carlina Matute, naibaga pay laeng ti biktima no asino ti nangpaltog kenkuana sakbay a natay.
