Pimmusay ti maysa a baket bayat a matamtaming iti balay pagagasan nga immuna naipadamag a kritikal ti kasasaad na gapu ti pannakapang-or ken naibaltog ti ulona iti semento idiay Barangay Nalvo, ili ti Sta. Maria.
Iti pannakiuman ti Bombo Radyo Vigan ken ni PLT. Jenson Refuerzo ti Santa Maria Municipal Police Station, adda nakariri ti baket a karruba na a lakay maipanggep kadagiti nakabulos a tarakenda nga aso.
Napasamak ti riri iti sangwanan ti pagtaengan ti suspek ta mapapati a rinaut daytoy ti biktima babaen ti sarrukodna.
Bimmales met ti suspek ket pinang-orna ti biktima ti tengnged ken ulona babaen iti sarrukod ti biktima.
Iti kangitingitan ti pasamak, mapapati nga inagaw ti biktima ti sarrukodna, isu a naawanan iti balanse ket natwang a gapuanan ti pannakaibaltog ti ulona iti semento.
Naitaray iti ospital ti biktima ngem pimmusay kabayatan ti pannakataming na kalpasan a na-comatose.
Segun ken ni Refuerzo, nabayagen a susik wenno pagrirriryan dagiti dua a senior citizen ti nadakamat a banag ngem tatta laeng nga adda ti napasamak a nakaro a panagriri dagiti dua.
