VIGAN CITY – Awan ti kariri ti babai a natay iti pammaltog idiay Barangay Cabaraoan, Magsingal idi September 12 kas pinasingkedan ti anakna.
Iti pannaki-uman ti Bombo Radyo Vigan ken ni Rudeliza Urubio, awan ti ammona a nagbasolan ti inana a ni Flordelisa Serrano Urubio, agtawen iti uppat a pulo ket siam a taga- Brgy. San Clemente, Magsingal a gappuanan ti pannakapaltogna isu a saanna a maawat ti napasamak.
Segun ken ni Rudeliza, napan nagpakan ti baboy ti inana idi kellaat nga impadamag ti ulitegna a napaltogan ti inana isu a napan iti ospital ngem idi nakadanon ket naamoanna a pimmusay gayamen.
Awan ti ammo a rason wenno motibo ti pammapatay ni Rudeliza ta narigat iti agitudo latan nga awan ti ebidensyana.
Ngem nupay kasta ket hustisya iti ikkis ti pamiliana gapu ti napasamak ti inada ta ammoda nga awan ti nagbasolanna ti padana.
Maipalagip a dead on arrival iti ospital ti biktima kalpasan a napaltogan ti namin-ano a daras bayat ti panagbisikletana a mapan koma agpakan ti baboyda.
