VIGAN CITY – Naisaganan iti kaso a sanguen ni Maricriz Corpuz nga agtawen ti 38 ta binagkong na ti kasinsin na a ni Rodel Bagaan nga agtawen ti 32 idiay Cabaroan, Magsingal idi alas kwatro iti malem ti April 6.
Segun ken ni Police Captain Joel Castillo, hepe ti Magsingal municipal police station, siguden nga adda iti saan a panagkinnaawatan ti biktima ken ti suspek ngem iti kaaldawan iti nasao a pasamak ket nagsangsango da pay laeng a naginom ti arak iti pagtaengan ti suspek.
Idi nalpasen a naginom dagiti dua, simreken iti uneg iti pagtaengan da ti suspek ngem iti saan nga ammo a rason ket tinungpa ti biktima isu a nakapungtot ti suspek ket nangala ti patadem nga inbagkong na ti biktima.
Ti agdama, agpapa-agas iti ospital ti biktima idinto a ti suspek ket nakakustodiya idiay Magsingal PNP.
Kabayatanna, malaksid a makasoan ti suspek gapu iti panangbagkong na ti kasinsin na, posible a makasoan pay iti panaglabsing iti pagannurutan a naiyetnag iti kangitingitan ti enhanced community quarantine, pakairamanan ti biktima ta naginom da iti arak uray nu liqour ban.
