Agtaltalinaed iti kustodiya ti Candon City Police Station ti maysa a babai kalpasan a nakemmeg a nagbayad iti peke a P1,000 iti maysa a pagtagilakoan idiay Barangay San Nicolas, Candon City, Ilocos Sur idi July 8, 2026 iti oras iti alas kuatro iti malem.
Ti suspek ket agtawen iti ppat a pulo ket pito, agnaed iti Barangay Maharlika, Taguig City idinto a ti biktima ket babai nga agtawen iti tallopulo ket maysa nga akin-kukua iti eatery nga agnaed idiay San Nicolas, Candon City.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, dayta ket bayat a maisagsagana ti kaso a sangwenna ta manamnama iti pannakaipila kontra kenkuana.
Segun ken ni Antalan, immunan a nagturong ti suspek iti puesto ti biktima tapno gumatang iti karne iti manok nga aggatad iti P180 ngem idi inyawatna iti P1,000 iti biktima ket napansin ti biktima a peke daytoy isu a dagus a kinomprontarna ngem timmaray ti suspek tapno aglibas nga isu met iti nakalapdan kenkuana ti maysa a traffic aide iti Candon South Central School a gappuanan iti pannakakemmegna.
Apaman a naiturn-over ti suspek iti Candon PNP ket naduktalan a kalugaranna met laeng iti immunan a nakemmeg a nanglimlimo iti lugar ket idi nasaludsod no agam-ammoda dayta ket pinagkedkedanna.
Kinuna ni Antalan nga inlawlawag ti suspek nga adda iti Candon City gapu ta na-hire a para-laba ngem saanna a maibaga ti tao a nangallukoy kenkuana nga agturong iti siudad ken uray iti ibagbagana a lugar a paglablabaanna ket awan iti naduktalan a kasta dagiti otoridad.
Naduktalan pay a ti naaramat a serial number iti peke a kuarta nga inusarna ket kapada met laeng iti nakemmeg idi napan a bulan isu a saan nga ikkaten dagiti otoridad nga adda pakainaigan ti suspek iti nasao a tao a nakemmeg idi kallabes.
