Addan ti inisyal a nagpapatangan dagiti karaman iti aksidente a nakairamanan iti tallo a lugan iti national highway idiay Barangay Sulvec, Narvacan, Ilocos Sur.
Dagiti karaman iti aksidente ti maysa a trailer truck a minaneho ti lalaki nga agtawen iti tallopulo ket pito, taga-Barangay Villamor, Cabarroguis, Quirino.
Ti Honda CR-V a minaneho ti agtawen-iti-innem a pulo ket walo nga American national a taga-San Vicente.
Ken ti motorsiklo a minaneho ti lalaki nga agtawen iti tallopulo ket maysa a taga-Barangay Paoa, Vigan City.
Iti pannaki-uman ti Bombo Radyo Vigan ken ni PCpt. Jumar Castro nga Acting Chief of Police iti Narvacan Municipal Police Station, kalpasan a nakaruar iti ospital dagiti dua a nadunor iti aksidente ket manamnama iti pinal a panagsasarita dagiti karaman ita nga aldaw maipanggep ti magastos kadagiti nadadael a paset iti luganda.
Maipalagip nga idi June 19 ket bayat ti panagpabagatan a direksyon ti trailer truck ket idi nadanonna iti sharp curve iti kalsada ket immagaw iti bangir a linya nga ayan ti sumungad a CR-V isu a nakakadinnungparna.
Ti met sumarsaruno a motorsiklo iti CR-V ket saanna a napakadaan ti pasamak isu a natukbobna iti daytoy a gappuanan iti pannakadundunor dagiti dua a driver isu a naipanda iti Ilocos Sur District-Narvacan para iti pannakatamingda.
Kinuna ni Castro a posible a saan a napakadaan ti driver ti trailer truck iti sharp curve iti nasao a paset ti kalsada a gappuanan iti aksidente.
