VIGAN CITY – Saan pay nga ammo nu kaanu iti pannakaitabon da James Oliver Marzan kenni Rho Anne Marzan, dagiti agassawa a natay ta naidungpar iti nagluganan da a Nissan Van ti maysa nga Isuzu Dump Truck idi naminsan nga aldaw idiay national highway ti Barangay San Juan, Sta. Lucia.
Ti bangkay dagiti agassawa ket nakaimasayag iti family house sa Rho Anne idiay Fuerte, Caoayan.
Segun ti ina ni Rho Anne a ni Susan Lazo, inton umay a lawas pay laeng a manamnama a sumangpet dagiti kameng ti pamilya ni James Oliver nga aggapu idiay Canada isu a saan pay a napagtutulagan nu kaanu iti pannakaitabon da.
Maladingitan ni Susan agsipud ta malaksid ti walo ti tawen na nga anak da a lalaki dagiti agassawa ket naulila da pay ti inudyan nga anak da a babai a makabulan na pay laeng ken kabunbunyag na laeng idi naminsan a Sabado kagiddan iti panagkasar dagiti dua iti simbaan.
