Saan nga ikkaten ti Abra Police Provincial Office ti posibilidad nga adda pakainaiganna iti umadani nga eleksyon ti pannakapaltog ti maysa a mangisursuro a nakairamanan ti maysa pay a dentista iti ili ti Bangued.
Dagiti biktima ket da Dr. Francisco Beleno Beria a maysa a dentista ken Odilon Peru Peria, mangisursuro iti Abra High School ken agnaed idiay Zone 3 iti nasao nga ili idinto a ti suspek ket saan pay a nabigbig.
Iti pannaki-uman ti Bombo Radyo Vigan ken ni PLTCOL. Daniel Pel-ey, Public Information Officer ti Abra PPO, kitaenda amin nga anggulo tapno matakuatan no ania ti posible a motibo iti pannakapapatay dagiti biktima ta manarimaan payen ti panangalada iti statement kadagiti katrabahoan ti mangisursuro.
Awan met ti pangta iti biag a naaw-awat ti mangisursuro a biktima basar iti pannakipatpatang dagiti pannakabagi ti linteg iti pamiliana.
Maipalagip a nakatugaw ti mangisursuro iti asideg iti alad ti panganan kadua ti kamestroanna idinto a ti dentista ket agmaymaysa a nakatugaw iti batogda a lamisaan idin dimteng ti suspek a naka-helmet ket inasikganna ni Peria sa pinaltuganna iti namin-uppat a daras kangrunaan iti ulo.
Nairaman met ti dentista a natirwan iti naiwawa a bala iti ulona a puon ti nakatayanna.
Naglibas ti suspek kalpasan ti pammaltog ket dagus met a nangisayangkat dagiti pannakabagi ti linteg iti hot pursuit operation.
