Imbestigaran dagiti pannakabagi ti linteg no adda pakainaigan iti negosyo wenno personal a biag ti pannakapaltog ti maysa a lalaki iti diversion road a sakupen ti Barangay Cabaroan, Bantay, Ilocos Sur.
Iti pannaki-uman ti Bombo Radyo Vigan ken ni PCPT. Donaldson Pagalanan iti Bantay Police Station, saan a gagangay ti panagideliver iti rabii ken iti diversion pay ti pagsarakan ti biktima ken ti kinatransaksyonna babaen iti messenger a gumatang iti lamisaan.
Agpatulongdanto iti Cybercrime Unit tapno mabigbig no asino ti akinkukua ti account a kinatransaskyon ti biktima iti alas dyes iti bigat idi kalman ta daytoy ket saanna pay nga am-ammo.
Maipalagip a ti biktima ket nagmaneho iti kurong-kurong kadua ti helper-na a mapan agideliver idin ta pinaltugan ti saan pay nabigbig a suspek a nakalugan iti motorsiklo.
Nagsagaba iti tama ti paltog ti biktima a naitaray iti balay pagagasan ngem dead on arrival.
Naala dagiti kameng ti Scene of the Crime Operatives (SOCO) ti lima a basyo ti bala iti nakapasamakan iti pammaltog.
