Pinasingkedan ti Department of Health a ti ingangato dagiti kaso ti Human Immunodeficiency Virus kadagiti agtutubo a Pilipino ket gapu la unay iti high-risk sexual behavior, agraman ti unprotected sex, online pornography, ken panagaramat kadagiti dating app, segun ken ni DOH Secretary Teodoro Herbosa.
Iti first quarter ti 2025, nakairekord ti DOH ti average a 57 a baro a kaso ti HIV iti kada aldaw.
Segun ken ni Herbosa, daytoy kastoy a klase ti aramid ti mangparparigat iti testing ken panangliklik, nangruna iti sektor ti agtutubo.
Maysa kadagiti kabaroan a kaso ket maysa a 12 years old nga ubing a lalaki manipud Palawan nga aktibo iti sekswal a pannakinaig – maysa kadagiti kaubingan a kaso ti HIV ditoy pagilian.
Madanagan pay ni Herbosa iti epekto ti social stigma, a manglaplapped kadagiti agtutubo nga agpatest.
Kas sungbat, imbaba ti ahensia ti age of consent para iti HIV testing kadagiti agtawen iti sangapulo ket innem.
