Saan a ninamnama ti maysa a graduate ti University of Northern Philippines nga isuna ti agbalin a Top 1 iti 2026 Nursing Licensure Examination.
Iti pannaki-uman ti Bombo Radyo Vigan ken ni Dianne Tacazon Tolentino, immuna a kinitana ti listaan dagiti nakapasa ket idi nakitana ti naganna, insarunona a kinita dagiti topnotcher iti exam.
Kinitana nga immuna ti listaan iti baba amangan ta karaman isuna iti Top 10 ngem nakigtot idi isuna ti umuna iti listaan.
Bineripikana pay nga umuna ta saan a mamati nga isuna ti nagbalin a Top 1.
Segun ken ni Tolentino, uppat a tawen a nagsagsagana para iti board exam-na, sipud pay idi 1st year-na pay laeng.
Kunana a maysa kadagiti karit a sinangona ket ti panangbukelna iti kumpiansa iti bagi, nangruna ta saan laeng a bagina ti kunana nga irepresentarna no di ket ti UNP ken ti intero nga Ilocos Sur.
Saan a nadaras kenkuana sakbay a nagun-odna daytoy a balligi ta namitlo a daras a nayospital ken arigna binulan nga agsakit idi manarimaan ti review-na. Iti agdama, plano pay laeng ni Tolentino nga i-practice ti panagbalinna a nurse ken maaddaan iti clinical experience sakbay nga agdesision no ituloyna ti agadal iti medisina.
