Pinasingkedan ni Mark Christian Palo nga adu a rigat ken sakripisyo ti Danggay-Saririt Cultural Dance Troupe manipud University of Northern Philippines sakbay ti panagkampeonda iti Ilocos Sur Festival Streetdance Competition and Showdown ita a tawen.
Iti pannaki-uman ti Bombo Radyo Vigan ken ni Palo, sipud idi damo ket adu a rigat ti sinangoda nangruna la unay iti pinansial nga usarenda tapno makasali iti kompetisyon.
Nainget ti panagsagsaganada tapno makabukel iti maysa nga orihinal a piesa ta adu nga oras ti nausarda.
Binigbigna pay met ti bannug dagiti nakipaset ta iti agmalem ket agpokusda iti klase idinto a no madanon ti oras ti alas singko y media iti malem agingga alas dyes iti rabii ket isu ti panag-training-da.
Nagun-od pay ti grupo ti Best in Musicality ken Star of Streetdance, kasta payen ti P500,000 a premyo.
