VIGAN CITY – Naawaten ti University of Northern Philippines ti ISO certification isu a maibilangen a world-class ti quality management ti nasao a pagadalan.
Iti pannaki-uman ti Bombo Radyo Vigan ken ni UNP President Dr. Erwin Cadorna, arapaap laeng kadakuada idi damo a maikkan iti ISO certification ngem babaen ti panagtitinnulong ken gagar ti amin a UNPians ket nagun-od ti ganuatda.
Maragsakan ti intero a UNP community ta nasubadan ti saanda a pannakaturturog ken bannugda sipud narugian ti panagiprosesoda kadagiti adu a requirements idi May 2021.
Ti laeng College of Teacher Education ti ISO-certified idi kallabes a dimmanun pay iti nakurang maysa a tawen ti panagsaganada ngem ita ket inramanen ni President Cadorna ti sangapulo ket pito a colleges, hospital, research ken administration.
Numan pay maibilang a dakkel a balligi ken pakasaritaan ti panagbalin nga ISO-certified ti UNP ket masapulda pay met a tungpalen dagiti rekomendasyon dagiti accreditors nga umay mangbisita iti nasao nga unibersidad.
