Naisayangkat ti Unity Walk, Interfaith Prayer Rally for Peace, ken panagperma iti Peace Covenant ken ti Solidarity Pledge dagiti political candidate para iti 2025 National and Local Elections.
Kagiddan daytoy iti pannakairugi ita nga aldaw ti kampanya para kadagiti senatorial aspirant ken partylist representatives.
Ti aktibidad ket indaulwan ni Provincial Director PCOL Darnell Dulnuan iti Ilocos Sur Police Provincial Office, kadua ti Election Supervisor Atty. Marino Salas nga isu ti Guest of Honor and Speaker.
Iti pannaki-uman ti Bombo Radyo Vigan ken ni Salas, ti addang ket kas panangipakita iti kalikagum a mapagtalinaed ti kapia iti probinsia kabayatan iti election period.
Kunana pay nga amin nga ili ket bambantayanda ngem ti laeng San Vicente ti naidalan iti yellow category idinto nga aminen nga ili ken siudad ket naipasidong iti green category.
Nakipaset iti daytoy nga aktibidad dagiti kapulisan ti nadumaduma nga ili, Bureau of Fire Protection, Philippine Coast Guard ken dagiti stakeholder.
