Pormal a nangipila ti MAKABAYAN bloc iti resolusion iti Kamara tapno maimbestigaran dagiti saan nga autorisado a transaksion iti maysa nga E-wallet a nakaigapuan a napukawan ti kuarta dagiti agus-usar ti application.
Iti House Resolution 2068, dagiti House Committees on Banks and Financial Intermediaries ken Information and Communications Technology ket mangisayangkat iti investigation in aid of legislation.
Maysa kadagiti biktima ket ni comedian Pokwang a natakawan iti P85,000 iti GCash account-na kalpasan a simrek ti unregistered numbers iti account-na.
Segun pay kadagiti dadduma nga agus-usar ti application a P4,000 ti napukawda uray awan ti naawatda nga OTP wenno one-time password para iti nasao a transfer.
Inlawlawag ti E-wallet, nga adda napasamak nga error iti system reconciliation process ken isolated laeng iti sumagmamano nga agus-usar.
Nupay kasta, saan nga inawat daytoy dagiti agpanpannday-linteg ket kinunada a rumbeng a sungsungbatan ni GCash ti napasamak.
