VIGAN CITY – Nasaripatpatan ti Armed Forces of the Philippines ti presensya ti unauthorized research vessel ti China a “Shen Kuo” iti bisinidad ti Viga, Catanduanes.
Segun kenni AFP Public Affairs Office Chief Col. Xerxes Trinidad, ti vessel ket immuna a nakitada idi pay Abril 25 iti kaadayo a 60.9 nautical miles iti daya a paset ti Rapu rapu island idiay Albay.
Iti naudi a report ti Tactical Operations Wing Southern Luzon, bayat iti maritime patrolda idi Abril 27 ket naobserbarda ti research vessel nga adda iti nasao a lugar nga awan ti tao iti main deckna.
Gapo dayta binilin dagiti otoridad dagiti asideg a barko ti pilipinas iti lugar a paingiten ti surveillance ken agreport nu adda ti aniaman nga addang nga aramiden ti nadakamat a research vessel.
