VIGAN CITY – Kinasoanen ti Sta. Cruz Police Station ti maysa nga unauthorized distributor ti Solane gas company nga agideliver kadagiti produktona idiay Abra.
Nabigbig ti suspek a ni Robert Benauro, agtawen iti uppat a pulo ket walo a taga-Brgy. Riang Peñarrubia, Abra, driver ti Aluminum Van Truck ken ti pahinantena a ni Jhon Mart Bartolome, agtawen iti duapulo a taga-Toon, Lapaz, Abra.
Segun ken ni P/Capt. Roger Baling-oay Jr., nasurok kumurang limapulo a ribo a gatad ti 293 a tanke ti LPG ti nasalamaan dagiti pannakabagi ti linteg manipud iti suspek.
Immunan a pinakaamoan ti Solane company ti Sta. Cruz Police Station nga adda mangpekpeke kadagiti produktoda isu a nangisayangkatda iti surveillance ket amin a lumabas nga adda kargana a solane gas ket ininspeksyonda.
Inlawlawag ni Baling-oay a tunggal probinsia ket adda authorized distributor ti nasao a gas company ket naduktalanda a daytoy a suspek ket saan nga authorized distributor.
