VIGAN CITY – Natalna ti panangrugi ita nga aldaw ti election period para iti Barangay ken Sangguniang Kabataan Elections ditoy probinsia.
Iti pannaki-uman ti Bombo Radyo Vigan ken ni Provincial Election Supervisor Atty. Ericson Oganiza, manageable ti sitwasyon kadagiti COMELEC office ta kabaelan met dagiti opisial ti mangmanehar iti kinaadu dagiti agipila iti COC-da.
Ngem kiddawna kadagiti umay agipila iti COC a saandan nga urayen pay ti September 2 a deadline ken siguradoenda a kompleto dagiti requirement nga ipasada.
Kabayatanna, alas dose uno itay parabangon ket narugianen ti checkpoint kadagiti ili ken siudad idinto nga alas syete itay bigat ket narugian met ti COMELEC checkpoint.
Pagyamananda dagiti motorista agsipud ta ammoda ti makitinnulong kadagiti pannakabagi ti linteg a mangiwaywayat iti checkpoint kadagiti kalsada.
Impalagip ni Oganiza a maisaysayangkat ti checkpoint tapnon masigurado ti kinatalged dagiti agngayangay ken malapdan dagiti agplamplano iti madi.
Visual search laeng ti mabalin nga aramiden dagiti ag-checkpoint ta madi a malukatan dagiti bag iti uneg ti luganda ken saandan a kasapulan pay ti dumsaag.
