VIGAN CITY – Nairekord ti pagilian iti umuna a kaso ti Q fever, segun iti Bureau of Animal Industry.
Makaakar kadagiti tao ti sakit a gagangay a makaapekar kadagiti baka, karnero, ken kalding no malang-anda ti kontaminado a tapok.
Makarikna dagiti makaptan a tao iti panaglammin, gurigor, muscle pain, ken no saan a mataming, mabalin nga agkumplikasyon iti dalem wenno puso.
Kaaduan kadagiti kalding a nagpositibo iti sakit ket manipud iti Santa Cruz, Marinduque, segun ken ni Dr. Christian Daquigan, officer-in-charge ti National Veterinary Quarantine Services Division ti BAI.
Innayonna nga awan pay ti kumpirmado a human case iti lokal.
Segun iti Department of Agriculture, temporaryo nga iparitda ti panagangkat kadagiti kalding manipud idiay Amerika.
Ti Q fever ket sakit gapu iti bacterial pathogen a Coxiella burnetiid, basar iti National Institute of Health.
