Ideploy ti Philippine National Police (PNP) ti 11,949 a polis iti intero a pagilian a mangsigurado ti seguridad iti kaaldawan ti State of the Nation Address ni President Ferdinand Marcos Jr. inton July 28.
Kinumpirmaran ni PNP Spokesperson PBGen. Jean Fajardo a nagpayawag ti command conference ti hepe iti PNP a pakipasetan dagiti regional director kangrunaan iti regional director manipod National Capital Region Police Office tapno pagpatangan ti agbalin a deployment iti aldaw ti SONA ti presidente.
Kalpasan dayta ket mangisayangkat ti maysa a coordinating conference ti PNP kadua ti biang ti Office of the Sergeant-at-Arms iti House of Representatives tapno masimpa dagiti security protocols nga ipatpatungpal iti uneg ken ruar iti Batasan.
Maisaruno ti panangted ti Manila Shield ti nayon a tulong kadagiti polis manipod Police Regional Office 3 ken Police Regional 4A tapno mabantayan ken mangipatungpal ti border control iti pagilian.
Posible pay a maaddaan ti minimal adjustment iti deployment iti mismo nga aldaw ti SONA a mabalin a pakaaramatan dagiti reserve forces iti pagilian tapno masigurado ti kinatalged ken kinaurnos iti nasao nga aldaw.
Kabayatanna, awan pay iti naawat nga aplikasyon ti Quezon City Police District para iti panagkiddaw ti permit to rally iti mismo nga aldaw ti SONA.
