VIGAN CITY – Dead on Arrival ti maysa nga ubing nga agtawen ti walo gapu iti pannakalmesna iti fish pond idiay Brgy. San Jose, Narvacan, Ilocos Sur.
Iti pannaki-uman ti Bombo Radyo Vigan ken ni PCapt. Arcadio Viloria, hepe ti Narvacan Police Station, kadua ti biktima ti gagayyemna nga agtawen ti pito ken agtawen ti siam a nagdigos iti fish pond idin nagbetted ti saka ti biktima isu nga impadas dagiti gagayyemna a tulongan ngem napaayda isu a nagawidda a nagpaarayat.
Segun ken ni Viloria, insigida a nagresponde dagiti kameng ti MDRRMC Narvacan ken PNP personnel isu a naipan ti biktima iti Ilocos Sur District Hospital Narvacan para iti pannakatamingna ngem naideklarar a pimmusay.
Inyunay-unay ni Viloria kadagiti nagannak iti panangbantay kadagiti ubbing kangrunaan nu mapanda agdidigos tapno saanda a maisagmak.
