Natay ti maysa nga ubing kalpasan a binagsol ti ama-na idiay Barangay Lacong, Tagudin, Ilocos Sur.
Ti biktima ket agtawen iti tallo idinto a ti suspek ket ti ama-na nga agtawen iti duapulo ket siam, agpada a residente ti nadakamat nga ili.
Basar iti imbestigasyon, nangeg pay laeng ti lola ken anti ti biktima nga agpatpatang dagiti agama iti oras ti ala-una ti parbangon idi Agosto 28.
Iti oras ti alas-11 iti isu met laeng nga aldaw, nadlaw ti lola ti biktima a saan pay laeng a rimmuar ti apo-na iti kuwarto-da.
Gapu daytoy, linukatan ti lola ti kuwarto ket nakitana a nabalkot ti apo-na iti ules ket idi inikkat na daytoy, nakita-nan a dara-dara iti barukong ti biktima.
Dagus a naitaray ti ubing iti balay pagagasan ngem naideklarar a dead on arrival.
Dagus met a pimmanaw ti suspek iti pagtaengan da kalpasan ti insidente ken awan ti naala a patadem iti lugar a nakapasamakan ti pammagsol.
Iti agdama, mannarimaan ti panangtunton dagiti pannakabagi ti linteg ti suspek.
