Maysa nga ubing nga adda parikut iti panagpampanunotna ti nadungpar iti traysikel iti national highway ti Barangay Baliw Laud, Sta. Maria, Ilocos Sur.
Ti ubing ket agtawen iti sangapulo ket dua, PWD, agnaed iti nasao a lugar.
Ti met drayber ti traysikel ket ti lalaki nga agtawen iti duapulo ket maysa, inluganna dagiti 3 a babai nga agpapada a taga-Bia-o.
Agpapa-abagatan ti traysikel iti national highway idin ta bigla a nakitanan ti biktima nga adda iti asideg iti sangwanan ti lugan isu nga awan ti gundawaynan a nanglisi ket nadungpar ti ubing.
Naisalat ti biktima iti manibela ti traysikel, isu a dagus nga inigganan ti drayber ngem naibbatanna met laeng isu a natinnag iti sementado a kalsada.
Gapu dayta, nagsagaba iti dunor iti nadumaduma a paset ti bagina ti biktima a naipaagas iti ospital para iti pannakatamingna.
Segun met kadagiti nakakita iti pasamak, naggapu iti arko ti Barangay Baliw Laud ti biktima ken bigla a timmaray a napan iti tengnga ti kalsada nga isu ti puon ti pannakadungparna.
