VIGAN CITY – Innem iti nakemmeg gapu iti panagay-ayamda iti tong-its idiay Brgy. Baliw Laud, Sta. Maria, Ilocos Sur.
Dua a lamisaan iti naaramat ket dagiti nakemmeg manipod table 1 ket da Sonny Marteja Dolor, agtawen iti uppat a pulo ket walo, naasawaan, awanan ti trabaho; Edgar Arreola Dolor, agtawen iti limapulo ket siam, butcher; Michelle Peria Espadero, agtawen iti duapulo ket dua , awanan iti trabaho; dagiti adda iti table 2 a da Glenda Dolor Mendoza, agtawen iti uppat a pulo, naasawaan, agtagilako; Jovelyn Aquino Mendoza, agtawen iti tallopulo ket siam, awanan iti trabaho; ken Nicasio Dela Cruz Estero, agtawen iti tallopulo ket pito, butcher nga agpapada nga agnaed idiay Brgy. Baliw Laud, Sta. Maria.
Iti pannaki-uman iti Bombo Radyo Vigan ken ni PCapt. Joel Dasargo iti Sta. Maria Municipal Police Station, nagturong kadakuada ti maysa nga anak iti nakisugal ta nasuron gapu ta saan nga inikkan ti amana iti kuarta ket inreportna iti araramidenda isu a nagrespondeda ket naaktuanda iti panagay-ayam iti tong-its dagiti suspek.
Manipod iti table 1 ket naala iti maysa a set iti baraha, sangapulo ket maysa a singko, lima a sag-pipiso, dua a sangagasut, tallo a monoblock chair ken maysa a kayo a lamisaan idinto a ti table 2 ket naala iti maysa a set iti baraha, tallo a sangagasut a pisos, pito a baente, lima a sag-singko, maysa a sangapulo a pisos, tallo a monoblock a tugaw ken lamisaan a kawayan nga adda iti P735 a pustada.
