VIGAN CITY – Natalgeden iti kasasaad ti ubing a nakagat ken linugoban ti maysa nga aso idiay Brgy. Cabaroan Daya, Vigan City.
Iti pannaki-uman ti Bombo Radyo Vigan ken ni Ana Maria Tagura nga ina ti biktima, napanda iti taltalon ket bayat iti panagpakanda ti dingwen iti parbangon idi October 1, 2022 idi nakigtotda nga agasawa ta nagsangit ti anakda a ni Angelo Arruejo, agtawen iti uppat ta saanda a nasiputan a naluguban ken nakagat iti aso.
Segun ken ni Tagura, impadas ti asawana a papanawen ti aso babaen ti panangpatit iti kayo ngem isu metten ti isaruno ti aso isu nga inyawatna ti bato ket binansagda ti aso agingga pimmanaw.
Apaman a nabugwan ti dunor ti ubing ket impadasda a sinapul ti dakkel nga aso a puraw a mapapati nga agballa ngem saandan a nakita pay.
Nupay natalekda a saan a maan-ano ti ubing ta manarimaan iti panagpatudokna iti anti-rabies vaccine ket naipan latta iti center para iti pannakatamingna.
Innayonna nga umuna a gundawayda laeng a nakitada ti nasao nga aso iti lugarda isu a saanda nga ammo nu sadino ti pangtuntonanda.
