VIGAN CITY – Nadundunor ti maysa nga ubing nga agtawen ti innem, Grade 1 student nga agnaed idiay Banaoang, Bantay gapu iti pannakadungparna iti maysa a pick-up iti nasao a lugar.
Segun ti Bantay Municipal Police Station, ti nagmaneho iti pick-up ket ni Mervin Maputo Atezon, agtawen ti uppat a pulo ket siam, naasawaan, company driver nga agnaed idiay Acacia St. Manggahan Napico, Pasay City.
Maibasar iti inisyal nga imbestigasyon, naamwan nga agpapadaya a direksyon ti pick-up idi aksidente a nadungparna ti ubing a nagballasiw iti highway manipod iti bagatan ket agturong iti amianan a paset iti kalsada.
Gapu ti dayta, nadundunor ti ubing iti nadumaduma a paset ti bagina isu a naipan iti Metro Vigan Hospital para iti pannakatamingna idinto a saan a naan-ano ti driver ti pick-up.
