VIGAN CITY – Kaso a Reckless Imprudence Resulting to Homicide ti maipila a kaso kontra ken ni Samuel Barba Gamboa, agtawen iti tallopulo ket lima, agnaed iti Barangay Casilagan Norte, Banayoyo, nagmaneho iti kotse gapu ti pannakadungparna iti agtawen-iti-sangapulo ket maysa nga ubing idiay Barangay Magsaysay, Santa.
Iti pannaki-uman ti Bombo Radyo Vigan ken ni Police Captain Mark Bryan Corpuz, mangidaulo iti Santa Police Station, bumallasiw manipud daya ti ubing a nakaiggem iti cellphone-na idin ta nadungpar ti agpapa-amianan a kotse.
Gapu ti kapigsa ti impact, naipurwak ti biktima, pito agingga sangapulo a metro ti kaadayona manipud iti nakadungparanna.
Segun iti ina ti biktima, naggapu iti pagadalanda ti anakna ta mapan koma agpatulong a makibasa idi napasamak ti aksidente.
Nagsagaba iti dunor ti ulo ti ubing a naipaagas iti ospital para ti pannakatamingna ngem saanen a nakalasat idinto a ti drayber ti kotse ket saan a naan-ano.
