VIGAN CITY – Nakalasat ti maysa nga ubing nga agtawen iti sangapulo ta dandani nalmes iti Bago Resort idiay Salcedo.
Iti pannaki-uman ti Bombo Radyo Vigan ken ni PLt. Mark Bryan Corpuz iti Salcedo Municipal Police Station, manarimaan iti inspeksyonda kadagiti naideploy a kakaduada iti nasao a lugar idi adda nagkiddaw iti tulong gapu iti pannakalmes ti maysa nga ubing.
Segun ken ni Corpuz, insigidada a nagresponde ket insayangkat iti CPR ni PSSg. Jomarette Alcantara a gappuanan iti pannakalasat iti nasao nga ubing.
Apaman a nalukayen iti panaganges ti ubing ket nagbakwar iti dara isu nga impanda iti Ilocos Sur District Hospital-Salcedo para iti naan-anay a pannakatamingna.
Kinunana a saan nga agnaed iti Ilocos Sur ti nasao nga ubing ta taga-San Jose del Monte, Bulacan-da ket bimmisitada laeng iti pamiliada a taga-Sta. Maria.
