VIGAN CITY- Mailukaten ti turismo ti Ilocos Sur kadagiti turista manipud ditoy Luzon pakairamanan ti Metro Manila mangrugi inton November 15 kas kinumpirmaran ni Tourism Sec Bernadeth Romulo-Puyat nga immay naglikmot kadagiti pagpasiaran ditoy siudad idi kalman kadua ni Gov. Ryan Singson.
Ti pannakailukat dagiti pagpasiaran ti probinsia kadagiti turista a mangayat a pumasiar nga aggapu iti sabali a lugar ket tapno in-inut a maisubli iti regta ti sektor ti turismo a naapektaran iti Covid19 pandemic ken matulongan dagiti negosyante a naawanan ti pagsapulan gapu iti pannakaisardeng ti operasyonda.
Maipalagip nga idi October 1 ket nalukatan dagiti sumagmamano a pagpasiaran ditoy probinsia para kadagiti taga Region 1 ken dagiti taga-Baguio babaen iti pannakaiyuswat ti Ridge and Reef Travel Corridor ti ti Region 1 ken Baguio kas paset ti tourism bubble.
Malimitaran laeng iti limapulo a turista iti inaldaw ti mapalubosan nga agpasiar ken kasapulan a nakompletoda ti requirements sakbay a makastrek kas ti negatibo a resulta ti RTPCR test wenno Rapid Antigen Test ken ti itinerary a masurot.
