VIGAN CITY – Pito gasut sangapulo ket lima ti nabenepisyaran iti kaudian a TUPAD payout program iti probinsia babaen ti tallo a milion a pisos nga inlatang ni Senador Joel Villanueva.
Segun ken ni Vice Governor Ryan Singson, sangagasut walopulo ket siam ti benepisyaryo iti ili ti Sto. Domingo idinto a lima gasut duapulo ket innem iti ili ti San Vicente.
Tunggal maysa kadakuada a nag-community service iti las ud ti sangapulo nga aldaw ket nakaawat iti tallo ribo pito gasut a pisos (P3,700).
Kabayatanna, mayur-uray ti badyet nga ited dagiti dadduma pay a senador nga agpaayto met kadagiti sabali nga ili iti probinsia, ta maysa pay ni Senador Grace Poe a nangikari a mangted isu a mayuray laeng ti pakaammo manipud iti Department of Labor and Employment.
Nupay kasta, nagyaman ti bise gobernador ken ni Senador Villanueva iti kanayonna a panagtulong iti probinsia ken ti panangipatungpalna kadagiti napintas a programana kasta met a bigbigen ti bise gobernador ti kapaspas ti panagsungbat dagiti senador a nangaprubar iti kiddaw ti probinsia.
