Sinitar ti Malakanyang dagiti dadduma a benepisyaryo ti Tulong Panghanapbuhay sa Ating Disadvantaged/Displaced Workers gapu iti mapapati a panangipakitada nga agdaldalusda para laeng iti photo opportunity.
Segun ken ni Palace Press Officer Usec Claire Castro, makitkita ti gobierno dagiti dadduma nga insidente nga agsagsagad wenno agal-ala iti basura dagiti benepisyaryo para laeng iti ladawan wenno video.
Kalpasan ti photo opportunity, dagus a pumanaw dagiti dadduma ken saandan a leppasen ti panagdalusda.
Adda pay gundaway nga agitambakda iti basura iti maysa a lugar tapno laeng maipakita nga adda daldalusanda iti video.
Nagpalagip ti Malakanyang a saan a baybayadan dagiti benepisyaryo ti TUPAD tapno agaramid iti peke a video wenno agpammarang nga agtrabtrabaho.
Gapu dayta ket allukoyenna ida nga ipasnek ti responsibilidadda ken tungpalenda ti serbisio kasukat ti maaw-awatda nga ayuda manipud iti gobierno.
