VIGAN CITY – Naisayangkat ti tune up game ti Pencak Silat para iti Region 1 Athletic Association wenno ti RIAA iti nagbaetan ti Ilocos Sur ken Ilocos Norte idiay Romico Martial Arts Sports Training Studio.
Segun ken ni Romeo Mico, national coach ti pencal silat team Ilocos Sur, ti nasao a tune up game ket gundaway para kadagiti dua a team a mabigbig no ania dagiti pagkuranganda tapno mapasayaatda pay ken maisagana da ti bagida para iti umadani a paay-ayam nga idi kallabes ket naisanud gapu iti pangta ti novel coronavirus.
Impasigurado ni Mico nga aramidenda amin a kabaelanda tapno matulongan dagiti player iti benneg ti nasao nga ay-ayam.
Maragsakan ni Solomon Elona, maysa kadagiti national coach ti pencak silat a napintas ti nagbanagan ti nasao a tune up game agsipud ta nalaing ken napigsa dagiti nakipaset nga atleta.
