Umaboten iti P163.48 milion ti tulong a naipaay ti national government ken local counterpart kadagiti pamilia a naapektaran iti panagputok ti Mt. Kanlaon idi December 9, segun iti National Disaster Risk Reduction and Management Council.
Pinasingkedan ti konseho a P109.55 milion ti naited idiay Central Visayas ken P54.53 milion met idiay Western Visayas.
Karaman kadagiti naipaima a tulong ti family food packs, sleeping ken hygiene kits, laminated sacks, modular tents, generator sets, ken financial aid.
Pakabuklan a 9,955 a pamilia kadagiti dua a rehion ti nakaawat iti tulong – 7,493 idiay Western Visayas ken 2,462 idiay Central Visayas.
Iti agdama, dagiti pamilia a naapektaran iti panagputok ti Mt. Kanlaon ket adda pakabuklanna a 12,227 a pamilia nga aggigyan kadagiti duapulo ket innem a barangay iti dua a rehion.
