VIGAN CITY – Naipaiman ti tulong iti maysa nga ubing a nadangran iti napasamak a magnitude 7.0 a gingined idiay Brgy. Nagongburan, Sinait manipod Kilusang Bagong Lipunan.
Pakabuklan a duapulo a ribo sangagasut dua pulo ket siam a pisos (Php 20,129) a donasyon iti naipaima kenni Princess Saladino nga ina ni Prince Jeon agtawen maysa a nasemento ti sakana.
Babaen kadagiti miembro ti Kilusang Bagong Lipunan Europe nga idadauluan ni Demetrio Rafanan ken Mario Racadio ket natulungan ni Prince.
Iti pannaki-uman ti Bombo Radyo Vigan kenni Princess Saladino, agyamyaman isuna iti grupo iti KBL a saan a nagdudua a tumulong kadakuada iti napasamak iti anakda.
Nagbalin a rangtay ti Bombo Radyo a nangipaimaan ti KBL Europe iti nasao a gatad a personal a naited iti pamilya ni Prince Jeon.
