Pinasingkedan ni Senador Erwin Tulfo nga inanamungan iti kaaddoan a senador ti singasing a sukatan ti schedule ti Senado tapno maikkan dalan ti impeachment trial a saan a maapektaran dagiti regular a trabaho ken plenary session.
Ti sarita ket kasaruno ti singasing ni Senate Impeachment Court Presiding Officer Sen. Chiz Escudero a bingayen ti oras iti trabaho ti Senado manipod Hulyo 27, a ti bigat ket maisayangkat ti trial idinto a ti malem ket maisayangkat ti session.
Segun ken ni Tulfo, no kas bilang maaprubaran ket alas dies iti bigat agingga alas dos iti malem ti impeachment trial ken mabalin a ma-extend agingga alas tres iti malem.
Kinunana a no mabalin a ti session ket mangrugi iti alas kuatro iti malem agingga rabii; kasta pay iti Huebes ken Biernes ket isu ti committee hearing; idinto a ti Sabado ken Domingo ket isu ti day off dagiti senador ken staff-da.
Gapu iti limitado nga oras a mailatlatang iti impeachment kada aldaw, impaganetget ni Tulfo a kasapulan nga agbalin a napili ken diretso iti punto iti panangilatag kadagiti ebidensia.
Namnamaenna pay nga agbalin a nainget ti presiding officer iti panagkontrol kadagiti mosyon ken manifestation tapno saan a masayang ti oras.
